CNJTL: PFN SAI ONA ICON POLITIKA ESTADU RDTL

Dezenvolve Juventude sai hanesan preokupasun setorial.
SEJD no CNJTL prepara Futuru Lideransa,  
[SEJD,30/05/2016].  Foto: Martinho Moniz

“Parlamentu Foinsa’e Nian, laos deit ona hanesan politika SEJD, maibé sai ona hanesan icon politika ba estadu RDTL”, dehan Prezidente CNJTL Maria Dadi Soares Magno iha Nia lia dahuluk.

Foinsa’e 130 kompostu husi Mane 65 no Feto 65 husi idade 12-17, reprezenta Postu Administrativu 65 Feto ida Mane Ida, aprende iha Parlamentu Foinsa’e Nian [PFN], nu’udar espasu ba foinsa’e sira hodi hetan formasaun ba moris iha vida publika, kultura demokrasia, debate no halo audiensia ba kestaun pertinente mak mosu iha sira nian fatin. 

Prepara an ba futuru lider Timor-Leste mak kualidade. Durante tinan rua [2] bazeia ba rezolusaun Governu Nu.23/18 Novembru 2009, kona-ba kriasaun Parlamentu Foinsa’e Nian [PFN].

Iha loron 30 fulan Maiu 2016 Sekretaria Estadu ba Juventude no Depostu [SEJD] hamutuk ho parseiru dezemvolvimentu, liu husi Komite Orientadora ba selesaun no eleisaun PFN 2016-2018, realiza workshop Nasional ba selesaun no eleisaun PFN, ba lejislatura datoluk iha Timor-Leste.

Tuir prezidente Komité Orientadora ba selesaun no eleisaun PFN 2016-2018, Ergilio Ferreira Vicente hateten katak “objetivu husi atividade ne’e atu aprezenta dinamika prosesu selesaun no eleisaun PFN 2016-2018 nian, mekanismu desimina informasaun ba publiku no kalendarizasaun”, dehan prezidente Komite Orientadora iha nia Intervensaun.

Iha fatin hanesan Prezidente Konsellu Nasional Juventude Timor-Leste [CNJTL], Maria Dadi Soares Magno akresenta katak, iha Planu Estratejia Dezemvolvimentu Nasional [PEDN] tau perioridade ba asuntu neen iha area foinsa’e nian, ida mak kontinua fo formasaun ba Membru PFN to’o 2030.

Maria Dadi Soares Magno sublina, CNJTL firmi atu servisu maka’as iha prosesu hotu, liu husi servisu monitorizasaun no avaliasaun hodi asegura vizaun refere. Prezidente CNJTL husu mos ba parseiru sira hotu atu nafatin ativu hodi asegura programa Parlamentu Foinsa’e Nian.

Atividade Workshop Nasional ba Selesaun no Eleisaun PFN 2016-2018 realiza iha Uma Laku-SEJD-Dili, kontinuasaun husi atividade ne’e, Komite Orientadora sei ba Munisipiu 13 hodi estabelese Ekipa Servisu ba selesaun no eleisaun PFN 2016-2018 iha nivel Postu no Suku.

Mak partisipa iha atividade ne’e, Diretor Geral, Inspetor Geral, Diretor Nasional Planu no Kooperasaun Institusional-SEJD, Fundasaun Alola, CNJTL Nasional, Koordenador CNJTL Munisipiu 12, UNICEF, no Alumni Parlamentu Foinsa’e Nian. Martinho Moniz