Agapito Amaral “Leki Calau” moris iha Matai, Loron 15 fulan Jullu
1945, Oan husi Aman Vidal Calau Berec (falecido) nu’udar liurai Suai Camanasa, no inan
doben Isabel de Jesus “Luru Tahuc” (falecida). Iha loron 06 fulan Janeiro 1968 simu
batismu iha Igreja Suai husi Pe. Bruno no komfirmado iha loron 07 fulan Marsu
1975. Iha loron 07 Janeiro 1968 Agapito
amaral “Leki Calau” simu primeiru komuñiaun iha Igreja Suai.
Hakna’ar nu’udar Catequista iha suco Matai, hodi fó sarani ba populasaun
Matai, no sasan lulik sia iha matai, no hari Kruz Matai iha tinan 1969, nudar
simbolu kristianizmu nian, hodi hatudu katak matai rai sarani no ema sarani.
Iha loron 10 fulan Marsu tinan 1969 simu sakramentu patrimoniu ho Sra. Virgina de Jesus (falecida), oan
husi Dinisa Barros “Cati Luan” (falecido)
no Ines Guterres “Soi Seran” (falecida).
Durante moris hamutuk ho Virgina de
Jesus, sia iha ai-fuan domin “Oan” hamutuk siwi, kompostu husi feto lima no
mane haat, Venancio Amaral, Joana de
Jesus (falecida), Amelia de Jesus
Amaral, Teodoro Amaral, Carmelinda Amaral, Antonia de Jesus, Ontónio Amaral (falecido), Domingos Amaral (falecido), no Elisabet
Amaral (falecido).
Agapito Amaral “Leki Calau” ho Virgina
de Jesus iha bei-oan (neto) hamutuk na’in 18, Julio Amaral (falecido), Santina Bianco Amaral, Faustino Bianco Amaral,
Ivonio Bianco Amaral, Sandra Bianco Amaral, Luis Diogo Gonzaga Bianco Amaral,
Helio Ozorio Bianco Amaral, Jacinta Cardoso de Jesus, Zeto Cardoso de Jesus,
Violanto Paicheco, Silveira de Jesus Amaral, Jesuino Paicheco Amaral, Febriana
da Silva de Orleans, João de Andrade (falecido), Teresia de Andrade (falecida) Moises de Andrade Amaral, Zuvanio Evan
Antonio, José Maria (falecido), no bei-oan nia oan ida, Florindo
Bianco Amaral.
 | |
| Agapito Amaral "Leki Calau", foto iha CCD, (Photo MM) |
Ama Leki Calau moris hanesan ema
agrikultor, halo to’os, hakiak animal hodi sustenta familia. Valores
responsável, dixiplina, respeitu, iha familia laran, mak lisaun edukativu husi
Bei Leki ba oan sia atu labele depende ba ema seluk, maibé aprende atu
responsabiliza no respeita ema seluk.
Maske hanesan liurai nia-oan, la halo-an hanesan liurai, la hatudu-an
hanesan ema riku, buka rasik ho liman-fuan-sanulu hamutuk ho nian fen, halo
to’os no negosiu hodi sustenta oan sia ba eskola. Husi oan na’in sia, nain hat
Aman Maromak bolu hikas ona, no na’in Lima ne’ebé sei moris, Ama Bei Leki ho
Ina Soi Lelok konsege dudu Venancio Amaral finaliza Sekola Menegah Pendidikan
Sosial iha Dili, Amelia de Jesus Amaral lisensiadu direitu iha Universidade da
Paz 2015, no oras ne’e haknar nudar Offical PNTL ho diviza primeiru sarzento,
Teodoro Amaral finaliza ensinu sekundariu, Camerlinda Amaral nu’udar
Bacharelato Equivalencia, oras ne’e haknar nudar Professora, no Antonia de
Jesus finaliza ensinu sekundariu.
La riku osan mean, maibé riku
domin. Ho laran luak haliku, lituk no libur oan sia hotu, la’os oan rasik
dei’it, maibe oan husi bin alin sia hotu. Durante tinan 20, hafoin nia kaben Virgina
de Jesus mate iha loron 28 fulan Outobro 1999, Ama Bei Leki la la’o nela
nia oan sia, halo to’os hodi kontinua sustenta oan no bei-oan sia.
Laiha buat ida mak diak liu aman
no inan, no laiha buat ida mak at liu, lakon inan no lakon aman. Iha fulan
Fevereiru tinan 2019, Leki Calau infekta moras “kanek” asumsaun kankru ibun. Durante fulan neen terus husi moras ne’e,
hela ho nia oan feto bo’ot iha Lohorai.
Durante moras, ama Leki Calau
nameno ba oan sia atu keta de’an malu, respeita inan no aman seluk sia no ema
matas sia, matas sia hadomi ki’ik sia, libur malu, keta fa’e malu.
 |
| Agapito Amaral "Leki Calau" nia Oan no Bei-Oan sia. Foto MM |
Ama Leki Calau niak familia sia
la simu atu hatoba ikus iha niak uma lisan rasik, maibé, bin, mau alin, oan no
bei oan sia, deside hodi hamutuk ikus ho siak ama iha uma Lihu Wai, durante
loron tolu kalan rua to’o ba tau iha fatin permanente santa cruz Matai, iha loron
29/07/2019, hafoin misa requem ne’ebé selebra husi Pe. Sebastião.
Nune’e, hodi oan kiak, no bei-oan
hotu naran, husu perdaun husi ita hotu mak iha ne’e no iha uma ida-idak ba
salan ruma mak Ama Leki Calau halo
durante nia moris, ohin ama Leki Calau niak jornada moris hotu ona iha mundu,
fó perdaun ba nia, no harohan ba nia, nune’e nia bele hetan perdaun husi Na’i ba
nia salan hotu, no simu nia iha Nia kadunan Santu.
Ama...! ami saudades, ami buka ama. Saudades ne’e ami
solok husi matawen. Ami labele sura ama niak diak, ami labele sura ama niak
domin, ami labele selu diak hotu mak ama nalo. Ama su’uk ami saudades, ami
tanis, ami lelir, tan ami buka ama, ami sura ama niak domin no diak hotu liu
husi matawen deik.
Boa viagen ama, la’o ba modi mohu susar no terus sia, mela diak mai ami, hamutuk
ho ina su’uk, mau alin sia, ama no bei sia, no matebian hotu, harohan ba Nai
Maromak hodi dodan ami, halo ami naroman hanesan fitun iha lalehan no be’ar
nu’udar raihenek iha tasi.
Ama Bei Leki Calau, Descança em paz.
Adeus.
Matai, 29 Jullu
2019
Tidak ada komentar:
Posting Komentar
Komentariu