JUVENTUDE MÁKINA NO INSPIRADÓR BA DEZENVOLVIMENTU SUSTENTÁVEL

Partisipasaun Juventude iha luta libertasaun pátria hanesan espiritu inspirador ba foinsa’e prezente, hodi luta ba libertasaun povu husi ki’ak no mudansa ba dezenvolvimentu nasionál.

Juventude mak autór ba dezenvolvimentu, mákina ba dezenvolvimentu no inspiradór ba dezenvolvimentu, mudansa signifikativa mosu bainhira partisipasaun Juventude nian máximu iha prosesu dezenvolvimentu.

PARLAMENTU FOINSA’E NIAN, FUTURU LIDER KUALIDADE

Press Release                                                                                                 

11 Maiu 2016

Dili, Timor-Leste

PARLAMENTU FOINSA’E NIAN, FUTURU LIDER KUALIDADE

Ai hanesan rekursu natural ne'ebe importante ba moris.
Membru PFN kuda Ai-Oan iha Maubisse [Raihusar.Blog].

Kriasaun Parlamentu Foinsa’e Nian [PFN] bazeia ba Rejolusaun Governu Nu.23/18 Novembru 2009, hanesan fatin aprende demokrasia no kultura debate ba foinsa’e sira, hodi prepara futuru lider kualidade iha Timor-Leste, ne’ebe tutela iha Sekretaria Estadu ba Juventude no Desportu [SEJD].

Parlamentu Foinsa’e Nian [PFN] hanesan forum aprendisajem no exersisiu ba dezenvolve, sensibilizasaun sosial ba foinsa’e sira liu husi formasaun ba moris iha sosiedade no iha vida publika hodi atinji poder politika no envolve an iha kestaun pertinente sira, identifika no komprende problema hirak ne’ebe akontese iha fatin ne’ebe Nia horik ba, iha inisiativa ba debate, halo audiensia ba buat hirak ne’ebe mak komunidade no/ka foinsa’e sira hasoru.

Programa PFN hahu implementa iha tinan 2010, husi Sekretaira Estadu ba Juventude no Desportu [SEJD] servisu hamutuk ho Konsellu Nasional Juventude Timor-Leste [CNJTL] no UNICEF, ne’ebé administra husi Sekretariadu Parlamentu Foinsa’e Nian.

Membru Parlamentu Foinsa’e Nian mak foinsa’e Timor-oan feto no mane ne’ebe ho idade 12-17. Total Membru parlamentu Foinsa’e Nian 130 kompostu husi feto 65 no mane 65 ne’ebe reprezenta Postu Administrativu 65 iha Timor-Leste feto ida no mane ida ba mandatu tinan rua. Periodu dahuluk [2010-2012] membrus hamutuk 130 kompostu husi feto 68 no mane 62. Iha periodu daruak [2013-2015] membrus 132 kompostu husi Mane 66 no Feto 66, aumenta membru espesial nain rua husi defisientes.

Ohin loron PFN tama ona ba terseira lejislatura iha Timor-Leste, nune’e iha fulan Juñu to'o Jullu 2016 Sekretaria Estadu ba Juventude no Desportu [SEJD], hamutuk ho CNJTL no UNICEF liu husi Sekretariadu PFN no Komité Orientadora sei hala’o selesaun no eleisaun ba Membru PFN terseira lejislatura iha teritóriu Timor-Leste.

Anunsia ba maluk foinsa’e sira mak iha interese, bele hakat ba sede suku ida-idak iha teritoriu tomak tuir kalendariu mak mensiona iha leten, hodi foti no prenxe formulariu, kompleta ho dokumentu nesesáriu hanesan: Sertidaun RDTL/ sertidaun batismu/ bileti identidade [BI], Diploma eskola ka revizaun literaria, deklarasaun Inan aman no deklarasaun domisiliu husi suku [hela fatin].

Informasaun klaru bele kontaktu ba numeru +670 3331317, bele mos vizita ami nia sitius ofisiál www.youthparliament.tl, ka bele hakat ba ami nia Fatin Rua Liberade da Impresa Becora, Dili. Email: secretariadopfn14@gmail.com / info@sejd.gov.tl no Funsionariu SEJD Municipiu hotu.

Loron aban hahu ohin, Investe agora retornu iha futuru.

Martinho Moniz

CBO-Sek.PFN

SENTIDU SOLIDARIEDADE BA JORNALISTA, ESTUDANTE UNTL LA’O AIN

“Journalist is not a crime, the voice of the voiceless, keta husik liberdade viola ema seluk nia liberdade nee krime”, lian solidariedade ba komemorasaun loron mundial liberdade imprensa.

Loron tolu fulan Maiu, loron mundiál liberdade imprensa, estudante departamentu Komunikasaun Sosiál, Fakuldade Siensia Sosiais, Universidade Nasional Timor Lorosa’e [UNTL] komemora loron ne’e ho atividade seminariu no marxa ho objetivu habelár prinsipiu liberdade imprensa no sentidu soliedariedade ba jornalista sira ne’ebe mate, terus hela iha sira nia servisu tanba limitasaun espasu ba liberdade imprensa no liberdade expresaun.