JUVENTUDE MÁKINA NO INSPIRADÓR BA DEZENVOLVIMENTU SUSTENTÁVEL

Partisipasaun Juventude iha luta libertasaun pátria hanesan espiritu inspirador ba foinsa’e prezente, hodi luta ba libertasaun povu husi ki’ak no mudansa ba dezenvolvimentu nasionál.

Juventude mak autór ba dezenvolvimentu, mákina ba dezenvolvimentu no inspiradór ba dezenvolvimentu, mudansa signifikativa mosu bainhira partisipasaun Juventude nian máximu iha prosesu dezenvolvimentu.

Polítika dezenvolve foinsa’e hanesan asuntu prinsipál iha ajenda Governu Timor-Leste nian, ba futuru Timor-Leste ne’ebé prósperu. Sekretariu Estadu ba Polítika no Formasaun Profesionál [SEPFOPE] hateten, Foinsa’e atu susesu presiza matenek no hahalok di’ak.

Foto CNJTL Rekursu Internet

“Oinsa mak foinsa’e atu bele asesu ba servisu hodi bele susesu. Joven tenki formadu, hahalok di’ak no iha koñesimentu. Buat tolu ne’e mak xave ba susesu. Aprende atu hatene, hatene hodi halo”, dehan Elidio da Costa Ximenes iha serimónia aniversáriu Konsellu Nasionál Juventude Timor-Leste ba dala XIV, Farol-Dili.

Governante ne’e akresenta katak, foinsa’e tenki matan moris no neon na’in, hatene uza tempu, buka aprende iha sentru formasaun profesionál sira mak eziste iha Timor no buka esperiénsia liu husi serbisu sira ne’ebé mak ita bele halo. Labele moe atu halo serbisu.

Iha fatin hanesan Eis-Kordenadór Prezidium Loriku As wa’in [PZLA] Mariano Asanami Sabino subliña katak, foinsa’e tenki matenek no servisu maka’as, banati tuir foinsa’e uluk nia ain fatin, tamba foinsa’e mak esparansa no lalenok Timor nian.

“Iha tempu luta ba libertasaun, Ami konsidera luta ne’e hanesan fiar ida, iha loron ida ita sei manan. Ami isin maubere klamar mos maubere, katak luta to’o mate, mate tia mos klamar sei luta nafatin. Tamba ne’e Joven sira tenki badinas atu estuda no aprende, ida ne’e hanesan kontinuasaun husi rezistensia, luta ba moris diak”, subliña Asanami.

Eis-Ministru Agrikultura ne’e mos esplika, iha simbolu nasionál Timor-Leste, Hino Nasionál ne’ebé kolia kona-ba “não há exploração” katak sei la husik no fo fatin ba explorasaun iha seitor ekonómiku, kultura no polítika. Timor-Oan tenki demokrátiku independente no servi ba interese públiku.

Juventude forte nasaun forte, badinas atu estuda, labele moe atu aplika. Partisipa iha konstrusaun estadu hodi kontribui ba dezenvolvimentu nasionál, Viva Juventude Loriku As Wa’in, 05 Maiu 2016.

Martinho Moniz